CD recensie
Jan Henk de Groot – Weerom

Ik had nog nooit heurt van Jan Henk de Groot veurdat ik berichties kreeg van Alex Vissering op Facebook dat ie samen mit de Troebadoers (Vissering, Jongendijk en de Groot) gung optreden ! En in november kwam dan zien eerste Grunniger CD (spaigelploatje) ‘Weerom’ uut in de Taolkraant is er natuurlijk ok ruumte veur aandere Nedersaksische talen dus daorumme dizze keer ies een Grunningse CD. Jan Henk hèf al in een bulte bandties espeult The Alcodoll, Coltfish, Stremler, Plantenga en De Groot, Goldfish mar ’t is allemaole begunt mit het playbacken van The Final Countdown. Mar hij hèf zeer zeker een gedegen opleiding geneuten op het Grunninger conservatorium en is now docent songwriting op de Schoele veur de Schone Kunsten.
Er staot dartien mooie verschillende liedties op die vake over de gewone dingen in ’t leem gaot.
Het begunt mit ‘Een mooi begun’ , een lied over zien dagelijkse doen en laoten, kiender en nog zoveule meer. Janneke , is zoen wichie dat ieder dorp wel hèf, een beetie vrumd mar wel geliefd bij iederiene en as der niet is wordt ze mist ! Wies mit die , is een liefdesveklaoring an iemand uut zien omgeving die onwies diepe in de putte zit en die hij er mit zien liefde er probeert uut te trekken. Aaltied zo , Is een verlangen umme trögge te gaon naor zien jeugd, maar toch tevreden mit wat ie now hèf ! Het grös is hum gruin genog ! Dubbelcassettedeck , is een nummer wat mij het minste ansprèk wat melodie betreft, mar het is net as het veurige nummer trögge in de tied ! Mamme van Michel , een zomers melodiechie over een eerste ‘seksuele ervaring’ op negen jaorige leeftied de blote borsten van zien kammeraodtie te zien in de tuune. Een flink aantal dagen van in de warre west, verliefd tot over zien oren ! ’t Ies van Kolham , hunkeren naor de winter; ja dat kan ! Ik hebbe d’r zölf niks mit mar sommige meinsen bint now ienmaol wild van scheuvelen. Weerom , het titelnummer van de CD; een strubbeling in de liefde hèf iedere wel ies en daor giet dit lied over weerumme gaon want vake kunt wij ok niet zunder mekare ! Vernuver mie wel , over het alleen wezen en toch vernuvert hij ‘m wel mar toch blèf er verlangen naor een vrouw. Terug noar de stamtoavel , de verhalen die verteld wordt an de stamtaovel bint de verdrieties die elkenien wel ies hèf, mar iederiene kan er zien verhaal kwiet ! Er wordt elusterd en dat is het belangriekste ! Kielsterachterweg , angstig liedtie over een straote die al veule slachtoffers maakt hèf, daor bij he’j bijna ’t gevuul da’j over die straote ried ! Sloap mor mien wichtje , slaopliedtie veur zien dochtertie waor zien liefde veur heur hartstikke dudelijk is. ’t Lester laid , is het leste liedtie op ’t spaigelploatje; giet over zien liefde veur de muziek en optreden waor ie niet zunder kan, mar as hij thuus komp zingt ie veur heur het leste lied !
Al met al is het een mooie CD eworden en wij as Drenten magt ok wel een beetie wies wezen mit dizze Grunniger want hij promoot mit zien muziek en goeie teksten wel de Nedersaksische taal. En de CD misstiet niet in een Drentse CD kaste !
Harry Boertien programmamaker Radio Hoogeveen ‘Plaatstaal’